«Ժողովրդական արվեստի հանգույց» կրթամշակութային հիմնադրամը ստեղծվել է 2014 թվականին՝ հայկական գործվածքի հավաքորդ Լևոն Դեր Բեդրոսսյանի կողմից:

Հիմադրամը փորձում է ապահովել հայոց ժողովրդական մշակութային արժեքների պահպանումը, հանրահռչակումը և այդ հենքով նրա զարգացման ապահովումը:

Հիմնադրամի նպատակն է վերածնել ավանդական ժողովրդական արվեստը՝ մասնավորապես ավանդական գործվածքը, երիտասարդ սերնդի մեջ սերմանել ստեղծագործական մոտեցում ձեռագործ աշխատանքի նկատմամբ: Նաև հատուկ ուշադրություն է դարձվում տեսողական արվեստին, մասնավորապես կարճամետրաժ վավերագրական ֆիլմերին: Մինչ օրս հիմադրամը կրթել է ավելի քան 2300 երեխաների և մեծահասակների Հայաստանի ամբողջ տարածքում։

Գործունեության առաջին իսկ օրից հիմնադրամի համար առաջնային և հիմնաքարային նպատակ է եղել ավանդական գործվածքի տեսակների ուսուցանումն ու գիտելիքների փոխանցումը երիտասարդ սերնդին: Հետագա տարիներին մշակվել են տարաբնույթ ծրագրեր, որով հիմադրամի գործունեությունը ծավալվել է՝ ընդգրկելով գրեթե ամբողջ Հայաստանը: Հայկական գործվածքի հայտնի տեխնիկաների դասավանդումից զատ հիմնադրամը զբաղվում է նաև նախկինում հայոց մեջ տարածված, բայց ներկայումս մոռացված գործվածքի տեխնիկաների ուսումնասիրությամբ՝ որոնցից են մետաքսե գորգի հյուսքի տեխնիկան և Բարձր Հայքի տարազախմբում օգտագործվող մետաքսե գոտեգործության տեխնիկան:

«Ժողովրդական արվեստի հանգույց» հիմնադրամը տեխնիկապես արվեստի տարածման գործունեության հետ համատեղ նաև տրամադրում է կրթաթոշակներ հայկական գորգերի ուսումնասիրության և հանրահռչակման նպատակով: